«Азбукадук» улгурил
Рассказы из «Азбуки»
Лев Николаевич Толстой — хэгдымэмэ лучады дукулан (писатель).
Нуӈан гэрбивэн упкачилду бугалду савкиль.
Книгалдуви Толстой луча тэги бэркэвэн, балдыдякви бугави аяврииван тадук, мэнми энэ мулана, бугави дысутчэӈэтвэн дукучан.
Толстой индечэн (бидечэн), бучэн-дэ (сэмчэн) Великай Октябрьскай социалистическай революция одалан. Книгалдуви нуӈан тэгэмэр правительствон тэдее ачирва законилва хуски кусидечэн.
Тар анӈанилду таткичилду баясал хутэлтын-нун татыӈкитын. Дядаӈил хутэлтын энэ алагувра эмэнмуӈкитын.
Дядаӈил крестьянил хутэлтын таттатын, Толстой адыва-да таткичилва нивдэтын бэлэчэн. Тарил таткичилду куӈакар тамана ачинди татыӈкитын. Толстой бикиттун Ясная Полянаду таргачин таткит нивчэ бичэн. Тар таткитту Толстой куӈакарвэ мэнин алагудячан.
Толстой томат куӈакарвэ аявуӈкин, куӈкакар-да аявуӈкитын нуӈанман. Нуӈан урокилдун куӈакар кэтэлвэ омакталва, интереснайва саӈкитын.
Куӈакар ургэе ачинди таттатын, хима талагувувчалди одатын, Толстой нуӈардутын азбукава-букварьвэ дукучан. Тар азбукаду нуӈан урумкурвэ улгурилвэ, нимӈакарвэ ичэвкэнчэн. Эр улгулирвлэ нуӈан хулукурду таӈдяриилдуви дукучан. Толстой улгурилдуви улгучэнчэн, он куӈакар тарил анӈанилду бинивэтын, эвиривэтын, таттыватын.
Куӈакар аявуӈкитын, тыкин-дэ аявдерэ эр улгурилвэ таӈдавэр.
Тыкни эр углубил эвэдыт дуукувчал. Хэгдымэмэ лучады дукулан Лев Толстой 75 анӈанилва маски дукунаван су балдыдяк турэндивэр таӈдяӈал бисис.
